Philosophia Botanica | Fructificatio | 88

88. Essentia FLORIS (87) in Anthera (86 & Stigmate (86) consistit.

FRUCTUS (87) in Semine (86).

FRUCTIFICATIONIS (87) in Flore & Fructu.

VEGETABILIUM (78) in Fructificatione (87).

Character partium plantarum difficile eruitur, nisi adsumantur duo prima Pollinis & Seminis.

1. POLLEN est pulvis vegetabilium (§. 3.), appropriato liquore madefactus rumpendus, & substantiam sensibus nudis imperscrutabilem elastice explodens.
2. SEMEN est pars plantae decidua, rudimento novae plantae foeta, & polline vivificata.
3. ANTHERA est vas Pollen (1) producens & dimittens.
4. PERICARPIUM est vasculum Semina (2) producens dimittensque.
5. FILAMENTUM est pes Antherae (3), quo vegetabili alligatur.
6. GERMEN est Pericarpii (4) Seminisve (2) rudimentum immaturum, existens praecipue eodem tempore, quo Anthera (3) Pollen (1) dimittit.
7. STIGMA est apex Germinis (6) roridus.
8. STYLUS est pes Stigmatis (7), connectens illud cum Germine (6).
9. COROLLA & CALYX sunt tegumenta Staminum, (1. 3. 5) & Pistillorum (6. 7. 8), quorum hic ex Epidermide corticali, illa ex Libro orta est.
10. RECEPTACULUM est, quod connectit partes praedictas (5. 6. 9).
11. FLOS ex Anthera (3) & Stigmate (7) nascitur, sive tegumenta (9) adsint, sive non.
12. FRUCTUS ex Semine (2), sive Pericarpio (4) sive non tectum, dignoscitur.
13. FRUCTIFICATIO omnis gaudet Anthera (3), Stigmate (7) & Semine (2).
14. VEGETABILE omne Flore (11) & Fructu (12) instruitur; ut nulla species his destituta.

Seminis essentia consistit in Corculo (§. 86.) quod Cotyledoni adnectitur, & ab eodem involvitur, dein tunica propria arcte vestitur.

Corculi essentia consistit in Plumula, quae punctum vitae ipsius plantae est sub minima mole, & uti Gemma crescit in infinitum; at basis Plumulae est Rostellum, quae descendit & Radices agit, olim matri contigua.

Propagines Muscorum sunt semina destituta tunica & cotyledonibus, adeoque nudi corculi Plumula, ubi Rostellum infigitur calyci plantae.