Philosophia Botanica | Varietates | 312
312. Morbosas plantas, vel etiam aetates in Nominibus varietatum assumere, saepius superfluum est.
Morbosae plantae a Botanicis receptae variae sunt, prout earum morbi.
Erysiphe Th. est Mucor albus, capitulis fuscis sessilibus quo folia asperguntur, frequens in Humulo, Lamio Fl. suec. 494. Galeopside Fl. suec. 491. Lithospermo Fl. suec. 152. Acere Fl. suec. 303.
Rubigo est pulvis ferrugineus, foliis subtus adspersus, frequens in Alchemilla Fl. suec. 135. Rubo saxatili Fl. suec. 411. Esula degenere R. & praesertim in Senecione sive Jacobaea senecionis folio incano perenni. Hall. jen. 177. inprimis in solo sylvatico ustulato.
Clavus, cum Semina enascuntur in cornicula majora extus nigra, ut in Secale & Caricibus.
Ustilago, cum fructus loco seminum farinam nigram proferunt.
Ustilago Hordei C B. Ustilago Avenae C. B.
Scorzonera pulveriflora H. R. P. Tragopogon abortium Loes.
Nidus insectorum caussatus ab insectis, quae ova deposuere in plantis, unde excrescentiae variae.
Gallae Querci, Glechomae, Cisti, Populi tremulae, Salicum, Hieracii myophori.
Bedeguar Rosae.
Folliculi Pistaciae, Populi nigrae.
Contorsiones Cerastii, Veronicae, Loti.
Squamaciones Abietis, Salicis, roseae.
Insecta saepe caussant plenitudines & prolificationes florum.
Matricaria Chamaemelum vulgare Fl. suec. 702. ab insectis minimis fit prolifera.
Carduus caule crispo Fl. suec. 658. cura insectorum gerit flosculos majores, griseos plenos vel potius prolifero-frondosos, pistillis in folia enascentibus.