Philosophia Botanica | Lectori botanico


LECTORI BOTANICO.


Fvndamentis Botanicis Theoriam atque Institutiones Rei Herbariae sub paucis Apohorismis olim comprehendi, quorum Explicationem per Exempla, Observationes & Demonstrationes, distinctis riteque definitis plantarum Partibus & Terminorum vocibus, Philosophiam Botanicam dixi, cum in his consistant Praecepta Artis.

Philosophiae ejusmodi Botanicae varias partes dudum emisimus, utpote in caput I. Bibliothecam Botanicam, II. Classes Plantarum, III. Sponsalia Plantarum, VII. VIII. IX. X. Criticam Botanicam XII. Vires Plantarum; Reliquas Sectiones Fundamentorum, sc. cap. IV. VI. XI. conjunctim cum prioribus in unum opus compingere & auctas novis exemplis, observationibus, demonstrationibus, sub Philosophiae Botanicae titulo edere, diu animo volvi, in quem etiam finem bene multa collegi; interea territum copia dicendorum satietas, imo taedium, operosae scriptionis me cepit, adeo ut haec in tempora commodiora seponere visum fuerat, quae cum annis, auctis indies curis publicis & privatis, muneris negotiis & peregrinationibus, Historiae Naturalis causa institutis, ita sese subtrahebant, ut de successu operis ipse dubitare coeperim.

Interea urgente Bibliopola, post distracta priora exemplaria, novam Fundamentorum Botanicorum editionem, a me quoque enixe petiere discipuli, ut Partes plantarum, artisque Terminos a me usitatos, rite definitos adderem, methodo, qua eos in praelectionibus tradere solitus sum; huic eorum petitioni accessere amicorum, de Re herbaria optime meritorum, adhortationes, ut Terminos artis explicarem, Partesque plantarum definirem; ut amborum desideriis adsurgerem, incepi collectanea mea in compendium redigere & typis mandare: at dira Anthritis, vix incepto opere, ita una cum corporis viribus mentem & animum fregit, ut in ipsa herba fere suffocatum fuisset. Nunc vero post recuperatas qualitercunque vires, Phisosophiae Botanicae Compendium heic sisto, mole parvum, utpote primas lineas primaque rudimenta Botanices in gratiam tantum Discipulorum editum, complectens, sed quod alio tempore, si fata velint & otia, longe auctius prodibit.

In calce opusculi adjeci nonnulla de Instructione disciplinae, ne paginae alternae vacuae relinquerentur.

Occupatus nunc in colligendis Speciebus Plantarum, praestantissimos per Europam Botanicos enixe rogo oroque, ut Plantas flore instructas, si quas possideant in duplo rariores, vel a me non dictas, mecum communicent, quo liceat easdem ad Genera referre cum adaequatis Differentiis; meum erit vicissim in opere, ad quamcunque speciem, publice testari gratum animum in eos, qui easdem communicarunt.



Upsaliae 1750. Septembr. 16.



CAR. LINNAEUS.