Philosophia Botanica | Synonyma | 318
X. SYNONYMA.
318. Synonyma sunt diversa Phytologorum (6) nomina eidem plantae imposita, eaque Generica (VII), Specifica (VIII), & Variantia (IX).
Patres §. 9. conveniebant plerumque in plantarum nominibus, genericis solum contenti.
Commentatores §. 10. ob defectum Descriptionum & Figurarum in Patrum scriptis, varie eorum nomina plantis adplicabant.
Descriptores §. 11. 12. detectis numerosioribus plantis, pro arbitrio nomina imponebant.
C. Bauhinus quadragina annorum labore, in Pinace 1622, Antecessorum nomina conjungebat & reduxit ad 6000 Species.
Curiosi §. 14. conquirentes undique novas plantas, reddidere numerum eorum duplo auctiorem.
Systematici §. 53. in generum constructione olim maxime diffentientes, secundum falsa genera, falsissima nomina plantis imponebant.
Legibus differentiarum specificarum non datis, Botanici Differentias partim triviales, partim variabiles, omnes lubricas, speciebus imponebant.
G. Scherardus, Anglus, Botanicus insignis, Bauhinii Pinacem continuare allaboravit, sed fato praeventus 1728. reliquit opus Dillenio.
Dillenius, Professor Sherardinus Oxoniis, continuavit opus Sherardi in annum, quo obiit, 1747.
Sibthorpius, successor Dillenii, Pinacem Sherardianum & Dillenianum, etiamnum ineditum, servat & supplet.
Hallerus variis in operibus Synonymiam absolutam plantarum Helveticarum elaboravit.
Synonymiae absolutae opus maxime necessarium est Botanicis;
Unico auctoris nomine detecto, innotescunt omnium.
Evolvi ideoque possunt Descriptiones & figurae omnes.
Innotescunt inde omnia quae beneficio seculi innotuere de planta.
Plura nomina non reddant amplius ideam plurium plantarum.
Specierum synonyma ad Botanicos praecipue spectant; Varietatum autem, quae saepius superflua, addat qui lubet, minuatur specierum falsarum numerus.