Philosophia Botanica | Differentia | 283


283. Ne varietas (158) loco speciei (157) sumatur, ubique cavendum est.


Hoc opus, hic labor est; adeoque summa industria inquirendum.

Errores gignunt, ut saepius coecutiamus, caussae imprimis sequentes:

  1. Natura polymorpha, in suis operationibus nunquam cessans.
  2. Regionum & Climatum diversa & singularis natura.
  3. Loca natalia remotissima.
  4. Brevitas vitae humanae, quae perit praecoci fato.

Certitudinem detegunt in speciebus, a varietatibus distinguendis:

Cultura in diversissimo & vario solo.

Partium plantae omnium examen attentissimum.

Fructificationis examen, quoad omnes partes etiam minutissimas.

Congenerum specierum inspectio.

Naturae leges constantes, nunquam saltus facientes.

Varietatum modi remoti.

Positio speciei sub proximo & diverso genere.