Philosophia Botanica | Differentia | 272
272. Pubescentia (136: viii.) ludicra est differentia, cum cultura saepius deponantur.
Spinas & Hirsutiem hic sub pubescentia intelligimus, quam plantae saepius exuunt a loco vel cultura.
Cultura facit ut miro modo mansuescant ferocissima animalia, quod idem & in plantis evenire quotidie observamus.
Urus ferox fit Taurus mitis,
Canis sylvestris ferox fit Canis mansuetus.
Spinosae arbores cultura saepius deponunt Spinas in Hortis; & ex acerbo fructu mitem porrigunt. e. gr. Pyrus, Citrus, Limon, Aurantium, Mespilus, Oxyacantha, Grossularia, Cynera, Cichorium sylvestre est foliis sinuatis dentatis asperis, sapore amaro ingrato.
sativum est foliis magis integris, lavigatis, sapore grato.
Hirsuties loco & aetate facillime deponitur.
Fagus primo e semine vel gemmis enata, hirsutissima; mox glabra evadit.
Heliocarpus tenella foliis tomentosis est, adulta vero glabris.
Triumfetta pusilla tomentosa est, adulta hispida.
Asperula odorata in sylvis villosa, in apricis scabra fit.
Persicaria amphibia in aquis glaberrima, in siccis scabra.
Thymus serpillum in campis glabra, in maritimis arenosis hirsuta.
Scabiosa suecisa in apricis glabra, in sylvis subhirsuta.
Plantago Coronopus in humido foliis glabris integris, in sicco hirsutis dentatis.
Lilium Martagon in sylvis hirsutum, in Hortis glaberrimum.
Clima mitius facit plantas mitiores, uti durius easdem duriores reddit, & saepe quasi pelle induit. Ad hirsutiem itaque & spinas non nisi summa necessitate congente confugiendum est.
Pentaphilloides palustre rubrum. crassis & villosis foliis, suecicum & hibernicum. Pluk.
Bugula non crenata tomentosa suecica. Pluk.