Philosophia Botanica | Characteres | 156


156. Filum ariadneum Botanices est Systema (155), sine quo Chaos est res herbaria.


Exemplo sit planta incognita indica: evolvat Botanophilus descriptiones, figuras, indices omnes, nec reperiet nomen, nisi casu; sed Systematicus sive antiquum, sive novum genus mox determinabit.

Systematicis, qui filum hoc duxere, omni aevo honos permanebit, quum eo destituti Maeandros Botanices errantes intrarent omnes.

Veri systematici Auctores s. Inventores probe a Compilatoribus distinguendi.

Systema etiam omissas indicat per se plantas, quod nunquam Catalogi enumeratio.