Philosophia Botanica | Sexus | 145
145. GENERATIONEM (138) Vegetabilium fieri mediante Pollinis Antheram illapsu supra Sigmata nuda, quo rumpitur Pollen, efflatque auram seminalem, quae absorbetur ab humore Stigmatis; quod confirmat Oculus, Proportio, Locus, Tempus, Pluviae, Palmicolae, Flores nutantes, submersi, Syngenesia, immo omnium florum genuina consideratio.
Oculus: Pollinem intrare Germina credidit Morilandus; ejusdem essentiam extrahi mediante stigmate madido statuit Vaillant; Pollinem Aceris rumpi in humore vidit B. Jussiaeus; omnem Pollinem in humore explodere auram seminalem confirmavit Needham.
Proportio: Stigmata sese flectere ad antheras, dein exseri ex Diantha, Passiflora, Nigella patet.
Pistillum ubi brevissimum, connivent Antherae supra stigmata: Saxifraga, Parnassia.
Connivent, dum efflant pollinem Antherae in Celosia.
Comprimit Corolla digitis antheras ad Stigmata in Teucrio.
Locus: Nunquam Pistilliferae sponte nascuntur sine staminiferis in eadem terra: prodeunt ex eodem semine ambae.
Tempus: in Diclinis flores ante germinationem foliorum plerumque prodeunt, ne folia tegant Pistilla: Salix, Populus, Corylus &c.
Pluviae combibunt Pollen, ut in Stigmata cadere nequeat; Hortulanis notissimum in Drupiferis & Pomiferis. Agricolis detestabiles in agris secalinis.
Fumus idem etiam facit, absorbendo humidum stigmatis.
Palmicolae: notissima Theophrasto, Plinio, Kaempfero, aliisque.
Pistaciae cultura in Archipelago: Tournefortius.
Caprificatio Veterum, & adhuc in Archipelago per Insecta. vide Dissert. nostr. de Ficu.
Flores nutantes gaudent pistillo staminibus longiore, ut cadat Pollen in Stigma: Campanula, Leucoium, Galanthus, Fritillaria.
Flores submersi adscendunt sub florescentia: Nymphaea, Stratiotes, Myriophyllum, Potamogeton, Hydrocharis, Valisneria.
Syngenesia frustranea, ubi stigma deest, ibi nulla foecundatio: in radio Centaureae, Helianthi, Rudbeckiae, Coreopsidis.
Tulipae solitariae si auferantur antherae ante casum Pollinis, sterilis evadet.
Brassicae diversarum varietatum, sub florescentia in eodem loco satae, nunquam distincta dabunt Semina.
Rhodiola in Horto ups. sterilis erat ab anno 1702 in 1750 dum mas adducebatur, tum semina protulit.
Clutia sterilis erat in Hortis plerisque Belgicis, sed visa Leydae femina foecunda, Marem adesse praedixi & reperi.
Cave ne Ficus, Humulus, Musa, Morus, &c. fructiferae absque Staminibus dissuadeant; Distinguas Partes fructificationis Calycem, Pericarpia, Receptacula a Seminibus.