Philosophia Botanica | Sexus | 134
134. Omne vivum ex ovo; per consequens etiam vegetabilia; quorum Semina esse Ova, docet eorum Finis, sobolem parentibus conformem producens.
Vivum omne ex ovo provenire exclamavit Harvaeus.
Finis & Essentia ovi consistit in puncto vitae.
Semina Filicum Bobartius, Muscorum Ego, Fucorum Reaumurius, Fungorum Michelius detexere; de Majoribus dubium non est.
Generationes plantarum ex semine & gemma esse coaevas docet Gemmarum consideratio & praecocitas florescentiae.